یہ کیف حُسن اس پہ یہ مستی شباب کی
یہ آپ ہیں کہ موج ہے کوئی شراب کی
سُونی ہے بزمِ عالمِ اِمکاں تِرے بغیر
ظُلمت ہے روشنی بھی شبِ ماہتاب کی
کیوں میری لغزشوں پہ زمانہ ہے طعنہ زن
سب لغزشیں معاف ہیں عہدِ شباب کی
ذوقِ سلیم چاہیے شاعر کے واسطے
حاجت ہے میکشی کی نہ فن پر کتاب کی
وہ سرد سرد آہیں وہ اختر شماریاں
دلچسپیاں تھیں یہ مِرے عہدِ شباب کی
جذباتِ حُسن و عشق سے لبریز یہ غزل
تصویر ہے کسی دلِ خانہ خراب کی
کیف آفریں ہے میرا غمِ عشق اے بہار
لذت نہ مجھ سے پُوچھ تُو ایسے عذاب کی
امیر چند بہار
No comments:
Post a Comment