پھول بہت مہنگے ہو گئے ہیں

 پھُول بہت مہنگے ہو گئے ہیں 

تم پھُول خریدنے کی استطاعت نہیں رکھتے 

یہ بھی پتہ ہے کہ تم میں پھُول چُرانے کا پتہ نہیں

تم تو پتا ہِلے تو ڈر جاتے ہو 

لیکن تم نے اپنے سر پر قبرستان اُٹھا رکھا ہے

جس کے بھار سے تمہاری گردن ٹُوٹ رہی ہے

پھُول ڈالے بنا تم اُس قبرستان کو کیسے دریا بُرد کرو گے؟ 

گھاس میں اُگے خودرو دو چار پِیلے پھُول توڑو

اور اپنے قبرستان پر رکھ کر 

اُس دریا تک جیسے تیسے جاؤ

جس کے پانیوں میں اُسے بہا لے جانے کا دم خم اب بھی باقی ہو

اور جب تمہارا قبرستان 

تمہاری نظروں سے اوجھل ہو جائے 

تو خُود سے وعدہ کرنا 

کہ باقی عُمر آسمان تلے 

ننگے سر رہو گے

ہمراز احسن