تخریبِ باغباں کی حقیقت چُھپی رہی
جب تک نقاب گُل کی چمن پر پڑی رہی
اُمید ناخُداؤں سے جب تک بندھی رہی
تب تک ہماری ناؤ بھنور میں پڑی رہی
جو جبر و اختیار کے بس میں پڑی رہی
کہیے وہ زندگی بھی کوئی زندگی رہی
ہم ان کے پاس رہ کے بھی محروم ہو گئے
سچ ہے سدا چراغ تلے تیرگی رہی
صبر آزما تھا دور گلوں پر بہار کا
اک موجِ خُوں دلوں میں، لبوں پر ہنسی رہی
جوشِ جنُوں! غضب تِری کوتاہ دستیاں
دامان و جیب سے ہمیں شرمندگی رہی
کیا میر کارواں کی حقیقت کہوں غبار
تھی رہزنی مگر روشِ رہبری رہی
حکیم غبار بھٹی
مشتاق احمد خاں
No comments:
Post a Comment