خیال سود نہ اندیشۂ زیاں ہے ابھی
چلے چلو کہ مذاقِ سفر جواں ہے ابھی
ہمارے نقشِ قدم سے چمک اٹھے شاید
فضائے منزلِ جاناں دھواں دھواں ہے ابھی
نئے نئے ہیں عزائم نئی نئی ہے تلاش
جمالِ دوست سے دل مطمئن کہاں ہے ابھی
رکا رکا سا تبسم جھکی جھکی سی نظر
تمہیں سلیقۂ بے گانگی کہاں ہے ابھی
ہمارے کام نہ آئی متاعِ دیدۂ دل
نگارِ صبح کا جلوہ بہت گراں ہے ابھی
غمِ حیات و پہنائیاں کسے دکھلائیں
زمانہ اپنی ہی وسعت سے سرگراں ہے ابھی
رُخِ حیات کی افسردگی نہیں جاتی
نجانے کون سا غم تشنۂ بیاں ہے ابھی
سکونِ دل کی تمنا سے فائدہ قابل
نفس نفس غمِ جاناں کی داستاں ہے ابھی
قابل اجمیری
No comments:
Post a Comment