عارفانہ کلام حمد نعت منقبت
آ، غمِ شبیرؑ آ، سینے لگا کے چوم لوں
کربلا کی خاک کو آنسو پِلا کے چوم لوں
آ میرے اصغرؑ صدا دیتی تھیں صغراؑ رات دن
آ تیری راہوں کو میں پلکیں بِچھا کے چوم لوں
یوں مخاطب لاشۂ اکبرؑ سے تھے ابنِ علیؑ
اٹھ میرے بیٹے تجھے دل میں بِٹھا کے چوم لوں
جب چلے میدان کو قاسم تو سیدؑ نے کہا
رک ذرا دولہا تجھے سہرا سجا کے چوم لوں
روک کر عونؑ و محمدؑ کو یہ زینبؑ نے کہا
آخری بار آؤ سینے سے لگا کے چوم لوں
تم بھی میری جانِ اصغرؑ پانی پی کر آ گئے
آنکھ تو کھولو تمہیں لوری سنا کے چوم لوں
رات دن جو آنکھ روتی ہے غمِ شبیرؑ میں
کیوں نہ میں صائم اسے آنکھیں جھکا کے چوم لوں
صائم چشتی
No comments:
Post a Comment