بھر گیا مجھ میں روشنی تِرا غم
محرما! کس قدر غنی ترا غم
دور کرتا ہے بے کلی ترا غم
چاہیۓ مجھ کو اور بھی ترا غم
جانے کس کس دیار میں ڈھونڈوں
اجنبی تُو ہے،۔ اجنبی ترا غم
ہو کے پُرنور، مجھ سے دل یہ کہے
کتنا روشن ہے یا اخی! ترا غم
رائیگانی برتنے والے وجود
کیسے جھیلے گا آدمی ترا غم
دھڑکنوں کے الاپ پر دل میں
رقص کرتا ہے ہر گھڑی ترا غم
بے خیالی میں اوڑھ کر مجھ کو
کرتا رہتا ہے شاعری ترا غم
میرے پانچوں حواس گم سم ہیں
کہہ رہا کوئی ان کہی ترا غم
یعنی آغازِ آگہی تِرا ہجر
یعنی تکمیلِ آگہی ترا غم
کاشف شاہ
No comments:
Post a Comment