اپنی محرومیوں کو چھپاتی ہوئی زندگی اور ہے

 اپنی محرومیوں کو چھپاتی ہوئی زندگی اور ہے

آئینے سے نگاہیں ملاتی ہوئی زندگی اور ہے

وہ دِیے اور ہیں دشمنی جو ہوا سے نبھاتے رہے

تیرگی کو اُجالا بناتی ہوئی زندگی اور ہے

شہرِ جاناں کی گلیوں میں ہنستی ہوئی زندگی اور تھی

دشتِ ہجراں میں یوں خاک اڑاتی ہوئی زندگی اور ہے

اونچے محلوں کی آسودگی کل مکینوں سے کہنے لگی

دائرہ دائرہ پیچ کھاتی ہوئی زندگی اور ہے

مسکراہٹ اک ایسا خزانہ ہے جس کی چمک ہے الگ

آنسوؤں میں مگر جھلملاتی ہوئی زندگی اور ہے

کشمکش میں عجب حسن ہے تم کو شاید نہیں ہے خبر

دور ہوتی ہوئی،۔ پاس آتی ہوئی زندگی اور ہے

اپنے دُکھ قہقہوں میں اُڑانے کا ہے اور ہی کچھ مزا

غم کے احوال پر مسکراتی ہوئی زندگی اور ہے

مجھ کو زخمِ سفر دے کے اک بار پھر آگہی نے کہا

درد کی آہٹوں سے جگاتی ہوئی زندگی اور ہے

رخسانہ صبا