روشنی کا سلسلہ ہے آپ کی دہلیز پر

عارفانہ کلام نعتیہ کلام

روشنی کا سلسلہ ہے آپﷺ کی دہلیز پر

بابِ گریہ کھل گیا ہے آپﷺ کی دہلیز پر

دل پہ اک آنسو گرا ہے یا مرا احساس ہے

اک دِیا سا جل اٹھا ہے آپﷺ کی دہلیز پر

اسمِ احمدﷺ ہے زباں پر روح تک سرشار ہے

درد کا کیا ذائقہ ہے آپﷺ کی دہلیز پر

پاؤں زخمی ہو کے بھی گردش میں ہیں رکتے نہیں

کس بلا کا حوصلہ ہے آپﷺ کی دہلیز پر

پھول، خوشبو، رنگ، تتلی، رات، جگنو، صبح و شام

جو بھی ہے، محوِ ثنا ہے آپﷺ کی دہلیز پر

وجہِ تخلیقِ ازلﷺ اور شافعِ روزِ ابدﷺ

وقت جیسے تھم گیا ہے آپﷺ کی دہلیز پر

اے طلبگارِ مدینہ، میں تجھے کیسے بتاؤں

خاک ہے یا کیمیاء ہے، آپﷺ کی دہلیز پر

کھولتا ہے دل پہ راہِ عشق کے اسرار کون

کون یوں مِدحت سرا ہے، آپﷺ کی دہلیز پر

رخسانہ صبا