مجھے تپتے ہوئے حرفوں کی بھٹی سے نکالو
میرے تالُو میں چھالے بن گئے ہیں گاؤں والو
پسرتے شہر کے پکے مکانوں میں گُھٹن ہے
کشادہ صحن کی عادی تھی میں اے شہر والو
یہ پگڈنڈی نشاں ہے، بس یہیں تک روشنی ہے
اب اس سے آگے ہاتھوں میں کوئی مشعل اُٹھا لو
سنو، ملنا ملانا، سب اُٹھا رکھتے کل پر
کہ جُز وقتی جُدائی میں بقا ہے، آزما لو
اگر وہ شیر کل پھر آ گیا، سب کھا گیا تو
تم اس سے پہلے اپنے گرد اک دیوار اُٹھا لو
محبت کا نشاں وہ بوڑھا برگد کٹ چکا، پر
تمہیں کس نے کہا اس کی جگہ کیکر اُگا لو
سنو، آسیب ہے تم سب کے دروازوں کے باہر
سو اپنے اپنے دروازوں پہ سب کُنڈی لگا لو
فرح گوندل
No comments:
Post a Comment