غلام آج بھی ہیں
راستے بوجھل
ساعتیں بے قیام سی ہیں
انہی پُرخار راستوں سے پرے، منزلِ وفا
جس کو پانے کی کہنہ مشقت
مجھے قدم قدم لیے پھرتی
یقیں کی گھڑیوں پہ، استوار
جیسے نبضِ بدن، کہ رفتارِ سفر
ساکت نہ ہو جائے کہیں
اک تمدن جس میں
جی جی کے مر چکا کئی بار
جس کی یادوں کے کھنڈر
آسیب کے پُر ہول نشاں
دیارِ اشک
جس کی فصیلوں کے آہنی مسکن
جن میں چسپاں
ناکردہ خلقت کی منجمد روحوں کا بیاں
فرشِ دلدل میں دھنسے
سسکتے، نامراد بدن
ان گنت صدیوں سے اٹھائے
زنگار زنجیروں کا وزن
جن میں جکڑے ہوئے لاچار
نشانِ عصبیتِ رنگ و زباں
اپنے بکھرے ہوئے
سانسوں کو اکٹھا کر کے
اب بھی جینے کی تمنا کئے بیٹھے ہیں
شاید زمینِ تنگ
سلطنتِ افلاک سے مل جائے
شاید حیات کا لہجہ بدل جائے
قیصر اقبال
No comments:
Post a Comment