جان لے گر تو جان لیتا ہے کیوں مِرا امتحان لیتا ہے

 جان لے گر تو جان لیتا ہے

کیوں مِرا امتحان لیتا ہے

کیا بتاؤں میں اپنا حالِ دل

جانتا ہوں تو جان لیتا ہے

زخم ڈھلتے نہیں ہیں لفظوں میں

کیوں مِرا تُو بیان لیتا ہے

دیکھ ہمدردیوں کا مرہم رکھ

سرخ آنکھیں کیوں تان لیتا ہے

دل کو سہلا بھی تھپکیاں بھی دے

دل تو بچہ ہے، مان لیتا ہے

آسماں کو زمیں سمجھتا ہے

جب پرندہ اڑان لیتا ہے

دیکھ کر وار کرنا پہلو سے

دیکھنا پھر سے جان لیتا ہے

کیا جلائے گی آگ اس کو جو

روز درسِ قرآن لیتا ہے

شاہ پھولوں سا دل تو رکھتا ہے

اور خوشبو پہ جان دیتا ہے

شہاب الدین شاہ