کیسا اس بزم کے لٹنے کا سماں ہوتا ہے

کیسا اس بزم کے لٹنے کا سماں ہوتا ہے

جس پہ ہر صبح اجڑنے کا گماں ہوتا ہے

میرے روٹھے ہوئے خوابوں ہی کی آواز نہ ہو

کون یہ پچھلے پہر نوحہ کناں ہوتا ہے

عمرِ ہر غم ہے بس اتنی تِرے اک غم کے سوا

شمع بجھ جائے تو پَل بھر کو دھواں ہوتا ہے

تیرے بیمار سے کیوں آنکھ چراتی ہے حیات

تازہ جب ذکرِ مسیحا نفساں ہوتا ہے

نقدِ جاں نذر ہی کرنے تجھے ہم آئے ہیں

اور ہوں گے جنہیں اندیشۂ جاں ہوتا ہے

کیا کہوں میں، مِرے اشعار بتا دیں گے وحیدؔ

رگِ الفاظ میں کب خون رواں ہوتا ہے

وحید اختر