کون کہتا ہے محبت کی زباں ہوتی ہے

کون کہتا ہے محبت کی زباں ہوتی ہے

یہ حقیقت تو نگاہوں سے بیاں ہوتی ہے

وہ نہ آئیں تو ستاتی ہے خلش سی دل کو

وہ جو آئیں تو خلش اور جواں ہوتی ہے

رہروِ راہِ محبت کی بلا یہ جانے

دن گزرتا ہے کہاں، رات کہاں ہوتی ہے

گلشنِ زیست میں آتی ہے ایک ایسی بھی بہار

پنکھڑی پھول کی جب نوکِ سناں ہوتی ہے

روح کو شاد کرے دل کو جو پُر نور کرے

ہر نظارے میں یہ تنویر کہاں ہوتی ہے

حسنِ خودبیں نہ برا مان کہ یہ وحشتِ عشق

بے نیازِ ہوسِ سود و زیاں ہوتی ہے

ضبطِ سیلابِ محبت کو کہاں تک روکے

دل میں جو بات ہو آنکھوں سے عیاں ہوتی ہے

زندگی اک سلگتی سی چِتا ہے ساحرؔ

شعلہ بنتی ہے نہ یہ بجھ کے دھواں ہوتی ہے

ساحر ہوشیار پوری