عارفانہ کلام حمد نعت منقبت
کبھی جالی کبھی گُنبد کبھی مینار کے پاس
بیٹھ کر نعتیں لکھوں روضۂ سرکارؐ کے پاس
کہکشاں یا مہ و خُورشید ہوں آتے ہیں سبھی
نُور لینے کے لیے مرکزِ انوار کے پاس
با ادب حُور و ملک جِن و بشر شاہ و گدا
ہاتھ پھیلائے کھڑے ہیں درِ سرکارؐ کے پاس
آپؐ سخیوں کے سخی، آپؐ ہی نبیوں کے نبی
جائیں کیوں چھوڑ کے در آپؐ کا اغیار کے پاس
ناز کس پر کروں اک آپؐ کی نسبت کے سوا
اور کیا ہے مِرے سرکارﷺ گُنہگار کے پاس
کُل خزانوں کا انہیں رب نے بنایا مالک
کیا کمی ہے کوئی بتلائے تو سرکارؐ کے پاس
اپنے دامن میں جسے آقاﷺ چھُپا لیں ناظم
کیسے جائے گا وہ محشر میں بھلا نار کے پاس
ناظم بریلوی
No comments:
Post a Comment