وہ ایک شخص جو پورا مرا نہیں بنتا

 وہ ایک شخص جو پورا مِرا نہیں بنتا

خدا تو بنتا ہے پر آسرا نہیں بنتا

کہیں پہ واسطہ ہونے کے باوجود سُنو

کسی حوالے سے بھی واسطہ نہیں بنتا

ہماری آنکھ سے دل تک رسائی کیسے ہو

عطا بغیر یہاں راستہ نہیں بنتا 

یہ دل اصول پرستی کا مُعتقد ٹھہرا

سبھی کا بنتا ہے پر آپ کا نہیں بنتا

تمہارا ہنسنا ہے معجز نمائیوں کا وجود

ہمارے رونے سے تو معجزہ نہیں بنتا

خراب لوگ بھی حالات کی ضرورت ہیں

بنایا جاتا ہے کوئی بُرا نہیں بنتا

طوالتوں پہ کبھی اِختصار وارا کر

گلے لگانے سے تو حوصلہ نہیں بنتا 

میں ایک جیسے ہی سپنے بناتی رہتی ہوں

کوئی خیال بھی تُجھ سے جُدا نہیں بنتا

کسی بھی درد کی نعمت تِرا نصیب نہیں

تِرا شعور اگر کربلا نہیں بنتا

میں زندگانی کا جب زائچہ بناتی ہوں

یہ زائچہ بھی تو تیرے سِوا نہیں بنتا

وہ بے خیالی میں ہنستا ہُوا مجھے دیکھے

جو کہہ رہا ہے کہ اب مُعجزہ نہیں بنتا

یہ شعر گوئی بھی مہوش عذاب ہو جاتی

اگر خیال کا حُجرہ نیا نہیں بنتا

مہوش احسن لاشاری