کیا سروں کے ساتھ ہے سازش دُھواں ہوتی ہوئی سی
پاؤں کے نیچے کوئی شے آسماں ہوتی ہوئی سی
ذہن کے آئینے میں گُلِ نُور مُرجھایا ہوا سا
مُشکِ قُربت، یاد جنت رائیگاں ہوتی ہوئی سی
عمر بھر آزار کی لذت، وہ شرطِ خوش کلامی
جم گئی نم دیدہ آنکھوں میں بیاں ہوتی ہوئی سی
اک شبیہہ آبنوسی جانِ آتشداں میں روشن
رات کی ہمراز قُربت کی زباں ہوتی ہوئی سی
سبز رنگت خواب رحمت سیاہ جنگل میں پلے ہیں
روشنی تہمت ہے زیب داستاں ہوتی ہوئی سی
جیسے شاہ وقت کا کشکول اک درویش بھر دے
ایک ساعت خوش گماں جھک کر کماں ہوتی ہوئی سی
عزمِ نور انداز تھی وہ، مائلِ پرواز تھی وہ
ایک چڑیا بجلیوں کا آشیاں ہوتی ہوئی سی
کون جانے کیا فسوں تھا، کس لیے اتنا جنوں تھا
کیا تھی وہ زندوں کی بستی لامکاں ہوتی ہوئی سی
کون جانے کب کہاں خورشید کو روپوش کر دے
شبنمی وہ سر زمیں آتش فشاں ہوتی ہوئی سی
خورشید اکبر
No comments:
Post a Comment