سیف الملوک سے شہزادے تو خوش قسمت تھا

 سیف الملوک سے

شہزادے

تُو خوش قسمت تھا

جس خواب کی اُنگلی تھامے

تُو رستم و کئے کی مٹی سے

سرکش دریاؤں تنگ نکیلی گھاٹیوں، سخت چٹانوں سے ہوتا ہوا

ساٹھ برس میں

مغرور ہمالہ کی اس پتھر چوٹی تک آ پہنچا تھا

اس خواب نے خود برسوں تیرا رستہ دیکھا

اور تیر ی سبز پری نے

پھر تیری پذیرائی اس شان سے کی

کہ اپنی مٹی، اپنا پانی

اور اپنی ہوا اور اپنی آگ

سب تیرے حوالے کر دی

تِرے پاؤں کے سب چھالے شبنم انجام ہوئے

تِرا ایک جنم اور ایک سفر

منزل سے آ کر گلے ملے

مِرے سارے جنم اور سارے سفر

منزل سے پہلے اُجڑ گئے

مِرے پاؤں ہمیشہ اُکھڑ گئے

پروین شاکر