اب اس کو سوچ کے ہی دل اچھل اچھل رہا ہے
کتابِ روح میں جو صورتِ غزل رہا ہے
ملیں گی صحرا سے اک روز باقیات مِری
کہ رفتہ رفتہ سمندر جگہ بدل رہا ہے
یہ ایک رمز نہیں ہے شعوری کوشش ہے
کہ پست ہونا مِری رفعتوں میں ڈھل رہا ہے
طلب کروں گا میں پہچان اپنی اب کس سے
کہ مجھ کو دیکھ کے آئینہ بھی پگھل رہا ہے
بضد ہو جانے پہ کیسے یہ جانتے ہوئے بھی
تمہارے رحم و کرم پر چراغ جل رہا ہے
چلو کہ اپنا ٹھکانہ بنائیں اور کہیں
پرانے قصے یہاں وقت اب اگل رہا ہے
خبر نہیں کہ کہاں پر یہ گِر رہے عادل
خلا کی پشت سے اب آسماں پھسل رہا ہے
عادل گوہر
No comments:
Post a Comment