میں تری سالگرہ پر اے دوست یہ بتا کون سا تحفہ بھیجوں

 سالگرہ کا تحفہ

میں تِری سالگرہ پر اے دوست

یہ بتا کون سا تحفہ بھیجوں

میری خواہش تو یہی ہے کہ تِری دعوت پر

سر کے بل چل کے میں خود جاؤں جنم دن پہ تِرے

ایک دلہن کی طرح تجھ کو سجانے کے لیے

تیری خوابیدہ امنگوں کو جگانے کے لیے

عیدِ میلاد کی اِک رسم سمجھ کر اس کو

بالارادہ تجھے سینے سے لگانے کے لیے

تیری طرح مِری مجبوری بھی یہ ہے لیکن

میں تیری بزم میں جاؤں گا تو سب دیکھیں گے

ناشکیبائی کا چرچا ہو گا

جس سے میرا ہی نہیں تیرا بھی دل ٹوٹے گا

اس لیے میں نے یہ سوچا ہے کہ بہتر ہے یہی

میں تِری سالگرہ پر اس بار

خود نہ جاؤں کوئی تحفہ بھیجوں

اور اب تُو ہی بتا دے مجھ کو

کیا کروں کون سا تحفہ بھیجوں

بھیجوں گہراب جو آنکھوں میں چُھپا رکھے ہیں

یا وہ جلدیپ جو پلکوں پہ سجا رکھے ہیں

یا تجھے اَدھ کھلی کلیاں بھیجوں

کہ تُو خود دیکھ سکے حالتِ دل

پھول بھیجوں جو سرِ نیزۂ شاخ

چاک دامان و دریدہ تن ہیں

یا تِری سالگرہ پر اے دوست

میں تجھے سب سے چھپانے کے لیے

خلوتِ شب میں بُلانے کے لیے

قیس کی رسم نبھانے کے لیے

تجھے الفاظ کا محمل بھیجوں

جس میں لیلئ مُعانی کب سے

بیٹھی ہے تیری ہی طرح خاموش

یا تجھے چاند کی کرنیں بھیجوں

جو تِرا نام جپا کرتی ہیں

میری پلکوں کی طرح

آبپاروں کا سہارا لے کر

دھیان کے چہرے پہ انجانے سے رسم الخط میں

کوئی افسانہ بیداد لکھا کرتی ہیں

خواب بھیجوں جو ادھورے ہیں ابھی

چشمِ بے خواب میں مشکل سے اتارے ہیں ابھی

یا تجھے رانجھا کی ونجلی بھیجوں

جو بجے ہیر کی پائل کی طرح

کیونکہ مقصود نہیں تجھ کو پشیماں کرنا

تشنۂ آرزو و اشک بداماں کرنا

کیوں نہ بھیجوں میں تجھے تیرے بدن کی خوشبو

جو مِرے شانوں پہ محفوظ ہے یادوں کی طرح

جو مہکتی ہے ہمہ وقت بہاروں کی طرح

خلوتِ شب میں دمکتی ہے ستاروں کی طرح

یہ بھی ممکن ہے کوئی شعر کہوں

اور اس شعر کے پردے میں تجھے

دل کا پیغامِ محبت بھیجوں

جشنِ تعریس کی دعوت بھیجوں

شعر گوئی سے مگر اس لیے ڈر لگتا ہے

ناشکیبائی بڑھی جو حد سے

شعر سرچنگ بھی ہو سکتا ہے

ایک سرہنگ بھی ہو سکتا ہے

قافیہ تنگ بھی ہو سکتا ہے

آخرش میں نے یہ سوچا ہے کہ دوست

میں تِری سالگرہ پر اس بار

تجھ کو اِک بند لفافہ بھیجوں

جس میں اِک سادہ ورق ہو، جس پر

تُو جو چاہے تو مجھے لکھ بھیجے

مل گیا ہے تجھے تحفہ میرا

سید فخرالدین بلے