کیا کیا میں تیرے نام نگارِ وطن لکھوں
رشکِ مہ و نجوم تیری ہر کرن لکھوں
گلپوش و گل بدوش کہ گل پیرہن لکھوں
گلشن لکھوں، بہار لکھوں، گل بدن لکھوں
جاناں لکھوں کہ جان لکھوں، جانٍ من لکھوں
کیا کیا میں تیرے نام نگارِ وطن لکھوں
دریا تیرے رباب ہیں، اشجار مثلِ چنگ
رشکِ مہ و نجوم ہیں تیرے یہ خشت و سنگ
اوراقٍ سادہ رنگ کو دے کر ہزار رنگ
ہر شعر کو بہارٍ طرب کا چمن لکھوں
کیا کیا میں تیرے نام نگارِ وطن لکھوں
رنگینیاں چُرا کے رخٍ ماہ و سال
نغموں کے گُل اٹھا کے بساطٍ جمال سے
لفظ و بیاں کو بھول کے دستِ خیال سے
قرطاسٍ مشک بار پہ سر و سمن لکھوں
کیا کیا میں تیرے نام نگارِ وطن لکھوں
جادو ہے تیرا حسن، بہاریں تیری فسوں
بجتے ہیں تیرے نام سے سانسوں میں ارغنوں
مصرعوں کو دے کے نرمئ لب ہائے لالہ گوں
ہر حرف کو سرور میں غنچہ دہن لکھوں
کیا کیا میں تیرے نام نگارِ وطن لکھوں
کیا خوفِ تشنگی ہے کہ صہبا ہے میرا نام
میخانۂ وطن سے ملے ہیں مجھے وہ جام
ہو جائیں گر نگارشٍ فن سے ورق تمام
نغمے نشاط کے سرٍ دشت و دمن لکھوں
کیا کیا میں تیرے نام نگارِ وطن لکھوں
صہبا اختر
No comments:
Post a Comment