بھلا دئیے جاؤ گے تم جیسے

 بُھلا دئیے جاؤ گے تم

بُھلا دئیے جاؤ گے تم

جیسے 

کبھی گزرے ہوئے زمانے میں

تم تھے ہی نہیں

بُھلا دئیے جاؤ گے تم

جیسے کوئی پرندہ 

کہیں مر کر گر جاتا ہے

جیسے کوئی ویران عبادت گاہ ہو

جیسے بُھولی بسری اجنبی محبت ہو

یا 

جیسے رات کے اندھیرے میں 

گلاب کا کوئی پھول

تم بھی ایسے ہی بُھلا دئیے جاؤ گے

میں راستے میں ہوں جہاں 

میرے بعد آنے والا اپنا قدم

میرے قدم پر رکھے گا

جہاں میرے بعد آنے والا شخص

اپنا عقیدہ میرے عقیدے سے لکھے گا

یا پھر میرے بعد آنے والا

وہ شخص ہو گا جو

اپنی فطرت کے جملے ترتیب دے کر

زندگی کی کہانی میں داخل ہو گا

یا پھر وہ

بعد میں آنے والوں کے لیے 

شاعری کا اثر چھوڑ جائے گا

اور ایک وہم بھی

بُھلا دئیے جاؤ گے تم

جیسے تم کبھی تھے ہی نہیں

جیسے تم کبھی ایک شخص نہ تھے

جیسے تم کبھی ایک زندہ وجود نہ تھے

ایسے تم بُھلا دئیے جاؤ گے

میں اپنی بصیرت سے بنے

راستے کا مسافر ہوں

کبھی میں کہانی کو

اپنی زندگی کا رنگ دے دوں گا

اور کبھی خیالات مجھ پر حکمرانی کریں گے

اور میں ان پر

میں اپنے خیالات کی شکل ہوں

اور 

وہ، وجود سے آزاد

لیکن جو بھی میں کہوں گا 

وہ پہلے بھی کہا جا چکا ہو گا

آنے والا کل 

مجھے گزرنے والا کل بنا دے گا

میں یادوں کی بازگشت 

کا بادشاہ ہوں

میرا کوئی تخت نہیں سوائے 

حاشیوں کے

اور یہ راستہ ہی سچ ہے

شاید پہلے آنے والے

کسی چیز کی صفت کو بُھول گئے تھے

اور اب میں اپنی یادداشت اور حس سے

اس کی نمو کو

حرکت دے رہا ہوں

بُھلا دئیے جاؤ گے تم

جیسے تم تھے ہی نہیں کبھی

جیسے کہیں

تمہارا کوئی نشان اور خبر نہ تھی

ایسے بھلا دئیے جاؤ گے تم

میں اس راستے پر چل رہا ہوں 

جہاں میرے بعد آنے والا

میرے قدموں پر چلے گا

اور میرے نظریے کی پیروی کرے گا

وہ بھی آ کر 

اجڑے گلستان کی یاد میں شعر لکھے گا

اس گھر کے سامنے

جو کل کے انسانوں سے آزاد اور خالی ہو گا

جو میرے بکھرے ہوئے

مستقبل سے  خالی ہو گا

جو میرے وجود اور عدم سے خالی ہو گا

میرے جنت جیسے وطن سے خالی ہو گا

جو میرے کنایات

اور میری زبان سے خالی ہو گا

اور میں دیکھ رہا ہوں

کہ میں اس وقت

مکمل زندہ اور آزاد ہو جاؤں گا 

جب میں 

بُھلا دیا جاؤں گا 

محمود درویش