میں تو کیا نام نہ باقی مرا آئندہ رہے

 نغمۂ یومِ آزادی

میں تو کیا نام نہ باقی مِرا آئندہ رہے​

تُو مِری جان مگر زندہ و پائندہ رہے​

تیری ٹھوڑی پہ یہ تارا، تِرے ماتھے پہ یہ چاند​

تا قیامت یونہی رخشندہ و تابندہ رہے​

حق ادا کر گئے جینے کا حقیقت میں وہی​

ایک دن تجھ پہ جو مرنے کے لیے زندہ رہے

​قلبِ پُرخوں کے دِیے، دیدۂ پُرنم کے چراغ​

بزمِ جاناں میں جلاؤ کہ درخشندہ رہے​

پیار سچا تو اُسی کا ہے، کسی حال میں ہو​

آپ اپنا ہی نہیں تیرا نمائندہ رہے​

سروِ بے فیض وہ سرکش ہے چمن میں رحمان

دیس میں رہ کے جو پردیس کا باشندہ رہے​

رحمٰن کیانی

عبدالرحمٰن کیانی