میں ہوں بجلی کے سرکٹ میں الجھا ہوا

شارٹ سرکٹ

میں ہوں بجلی کے سرکٹ میں اُلجھا ہوا 

چند سنجیدہ نقطوں کے محور میں گم

ہاتھ میں کچھ رزِسٹر کیپسٹر لیے 

ملٹی میٹر گلے میں پھنسائے ہوئے 

سوچتا ہوں کہ ان کو میں کیسے ملاؤں 

کہ سرکٹ مِرا دیر تک یوں چلے

جو کبھی نہ جلے 

کتنے ٹائم تلک کس رزِسٹر کیپسٹر کو ہے جوڑنا

بیٹری کتنی طاقت کی اچھی ہے ٭ڈیوڈ  ہے کون سا 

کس طرح یوز کرنا ہے یہ فارورڈ یا ریورس سمت میں 

کون سے ایٹموں کی ہے آپس میں اچھی گرفت

کون سے دوسروں کو سمجھتے ہیں اپنی طرح کون سے مختلف

ارے، یوں مِرا منہ ہو کیوں تک رہے؟ 

میں بہت دیر تک تم کو بورررررررر تو نہیں کر رہا؟

جانتا ہوں کہ تم ایسی باتوں کو بالکل سمجھتی نہیں

میں بہت بور ہوں 

ایسے لڑکے بہت دور کی سوچ کر، بہت دل لگی سے

روشن فیوچر کی شمع جلائے بہت خشک لیکچرز کو سنتے ہیں 

اور اپنے ماں باپ بہنوں کی فکریں سموئے گِلہ تک نہیں کرتے ہیں

ان کے دل میں چھپی ہمسفر کی وہ چھوٹی سی نازک خواہش 

کبھی جاگتی ہے تو وہ اس کو اس کی جگہ پر دبا دیتے ہیں 

دفنا دیتے ہیں 

خیر

بات پھر میرے موضوع سے ہی ہٹ گئی

ہاں تو میں تم کو سرکٹ کی اُلجھن سے بس آشنا کر رہا تھا

میں تو یہ چاہتا تھا کہ بس ان کو ایسے مِلاؤں کہ کوئی نئی چیز بن جائے

جو مجھے میری انجینئرنگ کا ثمر دے سکے 

تمہارے لیے ایک اچھا سا گھر دے سکے

ایسے میں جو اگر 

میں تمہیں وقت دے ہی نہیں پا رہا 

اور سرکٹ مکمل نہیں ہو رہا 

تو میں کشمکش میں اسی سوچ میں ہوں

پریشاں کہ سرکٹ کہیں جل نہ جائے 

میری زندگی سے کہیں تُو نکل ہی نہ جائے

سعد سین

٭diode