یہ نخل جاں کا ثمر تلخ عمر بھر کا ہے

یہ نخلِ جاں کا ثمر تلخ عمر بھر کا ہے

نہ پوچھ ہم سے کہ کیا ذائقہ ہنر کا ہے

ہجومِ سنگ میں بھی اس خیال سے خوش ہوں

کہ میری ذات سے اک جشن رہگزر کا ہے

جو مثلِ خاک سرِ رہگزار بیٹھے ہیں

ابھی نظر میں کوئی سانحہ سفر کا ہے

عجب تھے شہرِ چراغاں کے دیکھنے والے

دھویں کی سمت نہ دیکھا کہ کس کے گھر کا ہے

ابھرتی دھوپ میں میں بھی ذرا سی دیر کو ہوں

مِرا وجود بھی سایہ سا رہگزر کا ہے

دِیے جلے ہیں مگر دل بجھے بجھے سے ہیں شوقؔ

بہت دنوں سے یہ منظر ہمارے گھر کا ہے

رضی اختر شوق