پاس ادب ہے اس لیے ہم بولتے نہیں

پاسِ ادب ہے اس لیے ہم بولتے نہیں

جب بولتے ہیں آپ سے کم بولتے نہیں

ہیں جس قدر بھی آپ کے شائستۂ نظر

کھا کھا کے دل پہ ناوکِ غم بولتے نہیں

آواز دے رہا ہے یہ آزر کدہ سے کون

ہم نے تو یہ سنا تھا صنم بولتے نہیں

دنیا سمجھ رہی ہے انہیں ہم سے منسلک

جن کے معاملات میں ہم بولتے نہیں

حائل ہے ہم میں ان میں اک ادنیٰ سا اختلاف

مدت گزر گئی ہے بہم بولتے نہیں

اللہ رے وہ ان کی ندامت جفا کے بعد

گردن ہے اعتراف میں خم بولتے نہیں

ہم کو ہمارے منہ پہ وہ کہتے ہیں بے وفا

احسانؔ ہم خدا کی قسم بولتے نہیں

احسان دانش