جو التفات ذرا بھی نگاہ یار کرے

جو التفات ذرا بھی نگاہِ یار کرے

مِری خزاں کو نہ شرمندۂ بہار کرے

چھپا رہا ہوں میں اے ضبط غم محبت کو

مگر یہ ڈر ہے کہ افشا نگاہ یار کرے

جو بن گیا ہے سبب راحتوں کا دنیا میں

وہی گناہ نہ محشر میں شرمسار کرے

اسی کو حاصل صد زندگی سمجھتا ہوں

وہ نقد‌ عمر جسے صرف راہ یار کرے

وہ جان دے نہ سکوں کی تلاش ہو جس کو

وہ دل ہمیں دے جو ہر لحظہ بیقرار کرے

بناؤں رشک بہاراں نہ کس لیے اس کو

وہ زخم جو مِرے سینے کو گلعذار کرے

نہ سرگراں ہو وہی بادہ چاہتا ہوں میں

وہ بادہ کیا ہو جو صرف رہ خمار کرے

میں مٹ چکا ہوں مگر ڈر مجھے یہ ہے مہدی

ستم نئے نہ کہیں اور روزگار کرے

ہادی مچھلی شہری

سید محمد ہادی