کیوں بیج محبت کا بھی بونے نہیں دیتے

کیوں بیج محبت کا بھی بونے نہیں دیتے

پُر امن فضا شہر کی ہونے نہیں دیتے

ہے دل پہ جو اک بوجھ وہ ہلکا نہیں ہوتا

تنہائی میں بھی دوست تو رونے نہیں دیتے

بس چیختے رہتے ہیں وہ طاقت کے نشے میں

ہمسایوں کو بھی چین سے سونے نہیں دیتے

یہ دور خطرناک ہے اس دور میں دیکھو

بارود کے بچوں کو کھلونے نہیں دیتے

مجرم کو سزا دیتے ہیں اصلاح کی خاطر

زندانی کو مخمل کے بچھونے نہیں دیتے

مرتضیٰ برلاس