ہے اس کے گرد یہ محفل جو اک سوال میں چپ

ہے اس کے گرد یہ محفل جو اک سوال میں چُپ

لگی ہے اس کو بھی ایسے کسی خیال میں چپ

ہے اک طرفہ تماشہ طبیعتِ عشّاق

کبھی فراق میں باتیں، کبھی وصال میں چپ

خبر ہے اس کو بہت وقت کے گزرنے کی

ہے حسن اپنے ہی اندوہِ لازوال میں چپ

نگہ میں حسنِ بیاں جن کے بولنے سے تھا

ہوئے وہ اہلِ ہُنر رنجشِ زوال میں چپ

بہت کلام گزشتہ میں کر چکے ہیں منیر

دکھائی دیتے ہیں ہم جو بیانِ حال میں چپ

منیر نیازی