کیا چل سکے گی باد مخالف مزار میں

کیا چل سکے گی بادِ مخالف مزار میں

جلتا ہے دل جلوں کا چراغ اس دیار میں

بجلی سی دوڑنے لگی پھر جسمِ زار میں

دیواریں پھاندنے لگے وحشی بہار میں

الٹی ہوا زمانے میں چلتی ہے آج کل

فرق آ گیا ہے گردشِ لیل و نہار میں

ہنستے ہیں اپنے حال پہ دیوانے آپ کے

رہتے ہیں مست پیرہنِ تار تار میں

یوسف کو لے اڑے نہ کہیں بوئے پیرہن

اخفائے حُسن و عشق نہیں اختیار میں

دیندار و بت پرست اترتے ہیں ایک گھاٹ

کیا معجزہ ہے جنبشِ ابروئے یار میں

منزل کی دھن میں آبلہ پا چل کھڑے ہوئے

شورِ جرس سے دل نہ رہا اختیار میں

ہنستا ہے ناخدا مرے انجامِ کار پر

کشتئ عمر جب نہ رہی اختیار میں

کس کل پہ ہے یہ خاک کا پُتلا بنا ہوا

کیا جانیں کیا طلسم ہے مشتِ غبار میں

لیلیٰ کجا، کجا یہ طلسماتِ عنصری

کیا ڈھونڈتا ہے پردهٔ گرد و غبار میں

پیوندِ خاک ہونے کا اللہ رے اشتیاق

اترے ہم اپنے پاؤں سے اپنے مزار میں

شرمندهٔ کفن نہ ہوئے آسماں سے ہم

مارے پڑے ہیں سایۂ دیوارِ یار میں

کہتے ہو اپنے فعل کا مختار ہے بشر

اپنی تو موت تک نہ ہوئی اختیار میں

دنیا سے یاسؔ جانے کو جی چاہتا نہیں

واللہ کیا کشش ہے اس اجڑے دیار میں

یاس یگانہ