میری بدخوئی کے بہانے ہیں​

میری بدخوئی کے بہانے ہیں​

رنگ کچھ اور ان کو لانے ہیں​

رحم اے اضطراب رحم کہ آج​

ان کو زخمِ جگر دکھانے ہیں​

کیسی نیند اور پاسباں کس کا​

یاں نہ آنے کے سب بہانے ہیں​

کر کے ایفائے عہد کا مذکور​

اپنے احساں انہیں جتانے ہیں​

اسکی شوخی کی ہے کوئی حد بھی​

اک نہ آنے کے سو بہانے ہیں​

سر اٹھانا وبال ہے، اور یاں​

ناز ان کے ابھی اٹھانے ہیں​

ظلم سے ان کا پیٹ بھرنے تک​

ہم کو تیغ و تیر ہی کھانے ہیں​

ان بتوں ہی کو حسن دینا تھا​

کیا خدائی کے کارخانے ہیں​

الم و درد و رنج و بے تابی​

یار اپنے یہی پرانے ہیں​

کیا ہماری نماز، کیا روزہ​

بخش دینے کے سو بہانے ہیں​

میں کروں جستجو کہاں جا کر​

ان کے تو سو جگہ ٹھکانے ہیں​

قافیے کو بدل کے اے مجروحؔ ​

اور اشعار کچھ سنانے ہیں​

میر مہدی مجروح