کمندِ حلقۂ گُفتار توڑ دی میں نے
کہ مہرِ دستِ قلمکار توڑ دی میں نے
روایتوں کو صلیبوں سے کر دیا آزاد
یہی رسن تو سرِ دار توڑ دی میں نے
یہ میرے ہاتھ ہیں اور بے شناخت اب بھی نہیں
یہ اور بات ہے، تلوار توڑ دی میں نے
سفینے ہی کو میں شعلہ دِکھا کے نکلا تھا
جو اپنے ہاتھ سے پتوار توڑ دی میں نے
تحکمانہ ادا، اور فیصلے دل کے
کمانِ ابروئے خمدار توڑ دی میں نے
وہ دائروں سے جو باہر نہ آ سکے تنویر
وہ رسمِ گردشِ پرکار توڑ دی میں نے
تنویر احمد علوی
No comments:
Post a Comment