سو چکی جاگتے لمحات کی دنیا بیٹھو

 سو چکی جاگتے لمحات کی دنیا بیٹھو

اُٹھ کے تم چل بھی دئیے اور ذرا سا بیٹھو

لوگ گھڑ لیتے ہیں افسانے انہیں باتوں سے

بند کمرے میں سرِ شام نہ تنہا بیٹھو

کس قدر تیز ہوا چلنے لگی ہے باہر

بند کر دو یہ دریچے میرے پاس آ بیٹھو

آؤ، تنہائی کی دیوار سے لگ کر بیٹھیں

پھر نہ چمکے گا یہ گھنگھور اندھیرا بیٹھو

یاد ہے آج بھی وہ رات وہ خلوت وہ تیرا

تھام کر ہاتھ میرا پیار سے کہنا؛ بیٹھو

جب بھی اٹھتے ہیں قدم گھر کی طرف رات گئے

دل یہ کہتا ہے؛ وہ آیا کوئی سایا بیٹھو

مراتب اختر