بغل یاران میں خنجر بھی تو ہو سکتا ہے

 بغلِ یاران میں خنجر بھی تو ہو سکتا ہے

یار امید سے بڑھ کر بھی تو ہو سکتا ہے

ہجر کا زخم دیا تُو نے جو میرے دل کو

زخم ایسا تِرے دل پر بھی تو ہو سکتا ہے

یہ ضروری تو نہیں آنکھ سے دریا نکلے

دل میں اک غم کا سمندر بھی تو ہو سکتا ہے

رِند مسجد میں اگر جائے تو حیرت کیسی

شیخ کے ہاتھ میں ساغر بھی تو ہو سکتا ہے

آج تنہا میں اگر ہوں تو کوئی بات نہیں

ساتھ میرے کبھی لشکر بھی تو ہو سکتا ہے

دل کو جو بھائے ضروری تو نہیں حاصل ہو

وہ کسی اور کا دلبر بھی تو ہو سکتا ہے

عشق میں وصل مقدر نہیں ہوتا، لیکن

کوئی قسمت کا سکندر بھی تو ہو سکتا ہے

تجھ کو سمجھا گلِ بے خار تو یہ نہ سوچا

کوئی کانٹا تیرے اندر بھی تو ہو سکتا ہے

اس کٹھن رستے پہ کب تک چلیں تنہا تنہا

یہ سفر زیست کا مل کر بھی تو ہو سکتا ہے

یہ بھی ممکن ہے مجھے عشق ضمانت دے دے

دردِ دل ہے کبھی بہتر بھی تو ہو سکتا ہے

مل کے بچھڑا ہے وہ باسط تو قیامت کیسی

پھر وہی میرا مقدر بھی تو ہو سکتا ہے

باسط علی حیدری