زباں مجبور ہے لب پر فغاں ہے

 زباں مجبور ہے لب پر فغاں ہے

سراپا درد میری داستاں ہے

نگاہِ یار بھی ہے بد گماں سی

غرورِ حسن بھی دامن کشاں ہے

فراقِ دوست کا کیا ذکر آخر

وصالِ یار بھی دل پر گِراں ہے 

یہاں پر بات کرنا ہے قیامت 

وہاں فریاد کی جرأت کہاں ہے 

مِرا غم ہے مِرا سرمایۂ زیست 

مِرا ہر اشک میرا ترجماں ہے 

خمار آلود نظروں میں ہے جو کیف 

وہ ساقی تیرے ساغر میں کہاں ہے 

اگر مے حسن ہے تو عشق فاروق

خمارِ بادۂ شعلۂ فشاں ہے 

بشیر فاروق