ہوائے تیز کو جیسے دِیا قبول کرے
وہ خوش مزاج مجھے غمزدہ قبول کرے
اُسے بتانا کہ آنکھوں کا نُور جانے لگا
خُدارا اب تو مِرا دیکھنا قبول کرے
کریں گے بحث مسافت پہ بعد میں، پہلے
دُعا کرو کہ ہمیں راستہ قبول کرے
میں چلتا جاتا ہوں مٹتے ہوئے وجود کے ساتھ
یہ ریگزار مِرے نقشِ پا قبول کرے
بھرے جہاں سے مِلا احترام اپنی جگہ
میں چاہتا ہوں مجھے آئینہ قبول کرے
صداقت نیازی
No comments:
Post a Comment