دئیے ہیں زیست نے مجھ کو بڑے آلام تیرے بعد
مٹا بیٹھا ہوں اپنی ذات اپنا نام تیرے بعد
تِرے نینوں ہی سے پی کر مِرا دل مست ہوتا تھا
مزہ دیتا نہیں ہے مجھ کو یارا جام تیرے بعد
تُو جانا چاہتا تھا، میں نے بھی تجھ کو نہیں روکا نا
مگر دل کی زمیں پر اک مچا کہرام تیرے بعد
اگر قاصد وہ میرے حال کا پوچھے تو کہہ دینا
تڑپتا ہے سسکتا ہے وہ صبح و شام تیرے بعد
تِرے ہوتے مِری قیمت نہ بھر پایا کوئی لیکن
سرِ بازار میں تو بِک گیا بے دام تیرے بعد
کبھی جو لوٹ کر تُو میرے اُجڑے گھر میں آئے گا
تو پھر بتلاؤں گا کیسے کٹے ایّام تیرے بعد
تعلق میری خوشیوں کا جڑا ہے تجھ سے یوں جاناں
کہ دن کو چین ہے نہ رات کو آرام تیرے بعد
تِرے اس ہجر نے مجھ کو بھی شاعر کر دیا باسط
کہ دل پر ہو رہے ہیں رات دن الہام تیرے بعد
باسط علی حیدری
No comments:
Post a Comment