سر کاٹ کے کر دیجیے قاتل کے حوالے
ہمت مری کہتی ہے کہ اِحسان بلا لے
ہر قطرۂ خوں سوز دروں سے ہے اک اخگر
جلاد کی تلوار میں پڑ جائیں گے چھالے
یوں دیتے ہیں وہ عاشقِ بے صبر کو بوسہ
شمشیر پھر اے ترک نہیں تیغ یہ تیری
سیفی ہے، مِرے سر کی بلا کو جو نہ ٹالے
نادان نہ ہو، عقل عطا کی ہے خدا نے
یوسفؑ کی طرح تم کو کوئی بیچ نہ ڈالے
نقاشِ ازل نے تِری تصویر میں رکھے
اندازِ رخ و زلف زمانے سے نرالے
ہستی کی اسیری سے، شرر سے ہیں سوا تنگ
چھوٹے تو پھر اِدھر کو نہیں دیکھنے والے
سالک کو یہی جادے سے آواز ہے آتی
پامال جو ہو راہ وہ منزل کی نکالے
کچھ اور لبِ یار کی تعریف کروں کیا
وہ لعل کو دیکھے سے پڑیں جان کے لالے
گردِ رخِ زیبا رہیں کیوں کر نہ وہ زلفیں
دو سانپ حفاظت کو ہیں اک گنج کے پالے
صیاد چمن ہی میں کرے مرغِ چمن ذبح
لبریز لہو سے بھی درختوں کے ہوں تھالے
پیغام اجل ہوتے ہیں اس عشق کے صدمے
پالا نفسِ سرد سے اللہ نہ ڈالے
دشمن سے سمجھتے ہیں ہم اس دوست کو بدتر
مشتاق کو منہ اپنا دکھا کر جو چھپا لے
مضمون ہے تو شمع رخ یار کا آتشؔ
شاعر ہے اسے فکر کے سانچے میں جو ڈھالے
حیدر علی آتش
No comments:
Post a Comment