غبار محمل گل پر ہجوم یاراں ہے

غبارِ محملِ گل پر ہجومِ یاراں ہے

کہ ہر نفس، نفسِ آخرِ یاراں ہے

بتاؤ وجد کروں یا لبِ سخن کھولوں

ہوں مستِ راز اور انبوہِ رازداراں ہوں

مِٹا ہوا ہوں شباہت پہ نامداروں کی 

تباہ ہوں کہ یہی وضعِ نامداراں ہے

چلا ہوں پھر سرِ کوئے دراز مژگاناں

مِرا ہنر، ہنرِ زخم تازہ داراں ہے

یہی ہے وقت کہ آغوش وار رقص کروں

سرورِ نیم شبی ہے، صفِ نگاراں ہے

ہُوا ہے وقت کہیں سے علیم کو لاؤ

ہے ایک شخص جو کمبخت یارِ یاراں ہے

فراقِ یار کو ٹھیرا لیا ہے عذرِ ہوس

کوئی بتاؤ، یہی رسمِ سوگواراں ہے

جون ایلیا