تھا عبث ترک تعلق کا ارادہ یوں بھی

تھا عبث ترکِ تعلق کا ارادہ یوں بھی

عشق زندہ نہیں رہتا ہے زیادہ یوں بھی

اک تو ان آنکھوں میں نشہ تھا بلا کا اس پر

ہم کو مرغوب ہے کیفیتِ بادہ یوں بھی

نامہ بر! اس سے نہ احوال ہمارا کہنا

وہ تنگ خو ہے بگڑ جائے مبادا یوں بھی

سو گئے ہم بھی کہ بے کار تھا رستہ تکنا

اس کو آنا ہی نہیں تھا شبِ وعدہ یوں بھی

کچھ تو وہ حسن پشیماں ہے جفا پر اپنی

اور کچھ اس کیلئے دل تھا کشادہ یوں بھی

کوچ کر جاتے ہم کوئے محبت سے فرازؔ

ان دنوں چاک گریباں ہیں زیادہ یوں بھی

احمد فراز