اس چوٹ کو پوچھے کوئی اس خستہ جگر سے

اس چوٹ کو پوچھے کوئی اس خستہ جگر سے

اترا جو تِرے دل سے، گرا تیری نظر سے

اس طرح گزرتے ہیں تِری راہگزر سے

جو پاؤں کا ہے کام وہ ہم لیتے ہیں سر سے

دو چار بہے اشک تو کیا دیدۂ تر سے

بارش کا مزا یہ ہے کہ جو ٹوٹ کے برسے

کیا ان کی حقیقت ہے کہ تشبیہ انہیں دوں

غنچے کو تِرے لب سے، رگِ گل کو کمر سے

یوسف کی محبت کو زلیخا سے تو پوچھو

گو حضرتِ یعقوب کو تھا عشق پسر سے

دیکھا کہ رسوا کس میں ہے نرمی و نزاکت 

رخسار ملے آج انہوں نے گلِ تر سے

اے داغؔ مصیبت ہے حیاتِ ابدی بھی

اس رنج کو پوچھے کوئی الیاس و خضر سے

داغ دہلوی