یہ تماشے سر بازار بہت ہوتے ہیں

یہ تماشے سرِ بازار بہت ہوتے ہیں 

اچھی آنکھوں کے خریدار بہت ہوتے ہیں

ایک تو دل بھی لگائے سے نہیں لگتا ہے

دوسرا شہر میں تہوار بہت ہوتے ہیں

زندہ لاشوں کا یہاں سوگ نہیں کرتا کوئی 

مرنے والوں کے عزادار بہت ہوتے ہیں

ایسے مفلس بھی مرے حلقۂ احباب میں ہیں 

جن کے گھر پیسے کے انبار بہت ہوتے ہیں

ٹھیک سے ہم بھی یہاں نیند نہیں لے سکتے 

لوگ بھی خواب سے بیدار بہت ہوتے ہیں

کام کی کوئی خبر تو نہیں ہوتی لیکن 

ان دنوں میز پہ اخبار بہت ہوتے ہیں

ہم بھی شاعر ہیں مگر تم کو ذرا دھیان رہے 

اس قبیلے میں اداکار بہت ہوتے ہیں

بات کرنے کا سلیقہ ہو تو گھر کے صاحب

جان لیجے، در و دیوار بہت ہوتے ہیں

عشق دریا سے کوئی پار کہاں ہوتا ہے 

ڈوبنے کے لیے تیار بہت ہوتے ہیں

جاں سے جانا تو ہے پھر جان سے جانا عامی 

زندہ رہنے کے بھی آزار بہت ہوتے ہیں

عمران عامی