تو نہیں حسن چارہ ساز تو ہے

تُو نہیں حسنِ چارہ ساز تو ہے

تیری صورت نظر نواز تو ہے

تو اگر باوفا نہیں، نہ سہی

مجھ کو اپنی وفا پہ ناز تو ہے

خود فریبی سہی، وفاداری

دل بہلنے کا ایک راز تو ہے

سایہ افگن نہیں وہ زلف تو کیا

زندگی کی شبِ دراز تو ہے

کچھ نہیں داستانِ مہر و وفا

گرمئ حرفِ دل گداز تو ہے

کچھ نہ ہو اختلافِ دیر و حرم

کفر و ایماں کا امتیاز تو ہے

یہ تبسمؔ اگر نہیں صوفی

کیا ہوا رندِ پاکباز تو ہے

صوفی تبسم