ہے نرالی کششِ عشق جفا کار کی راہ
چاہِ کنعاں میں ملی مصر کے بازار کی راہ
رہ نما یاد الہٰی کا ہوا عشقِ صنم
پہنچے ہم کعبۂ مقصود کو کہسار کی راہ
کثرتِ شوق نے از بسکہ کیا عرصہ تنگ
شہرۂ حسن نے دیدار کا مشتاق کیا
نکہتِ گل نے بتائی مجھے گلزار کی راہ
پیشتر سب سے کیا طالعِ بد نے بیدار
حشر کے روز بھی دکھلائی مجھے یار کی راہ
تنگدستی نے زمانے میں یہ پایہ ہے رواج
یوسف اس عہد میں تکتا ہے خریدار کی راہ
نہیں مجھ سا کوئی دنیا میں سکندر طالع
آئینہ رو نے مجھے قتل کیا پیار کی راہ
لبِ بام آ کے جو دیدار کرے عام وہ شوخ
ایک ہو جائے ابھی کافر و دیندار کی راہ
پیار سے کہتے ہیں ان کو مسیحا عاشق
ناز سے چلتے نہیں خانۂ بیمار کی راہ
دیکھ کر صورتِ احباب کو پھر جاتا ہے
کج ادائی سے ہے الٹی تِرے رخسار کی راہ
زلف مشکیں کے جو سودے میں ہے دل گھبراتا
پوچھتا پھرتا ہوں ایک ایک سے تاتار کی راہ
حسن کے عشق نے ہستی میں عدم سے کھینچا
شوقِ یوسف نے دکھائی ہمیں بازار کی راہ
کھینچ لی ہے تو لگانے میں تأمل نہ کرو
کھوٹی ہوتی ہے میاں آپ کی تلوار کی راہ
عید ہو گی رمضاں جائے گا اے بادہ کشو
بند رہنے کی نہیں خانۂ خمار کی راہ
غیرِ حق کو میں سمجھتا ہوں خیالِ باطل
آتؔش اک دل میں نہیں ہوتی ہے دو چار کی راہ
حیدر علی آتش
No comments:
Post a Comment