اس واسطے دامن چاک کیا شاید یہ جنوں کام آ جائے

اس واسطے دامن چاک کیا شاید یہ جنوں کام آ جائے

دیوانہ سمجھ کر ہی ان کے ہونٹوں پہ مِرا نام آ جائے

میں خوش ہوں اگر گُلشن کے لیے کچھ میرا لہو کام آ جائے

لیکن مجھ کو ڈَر ہے، اس کا گلچیں پہ نہ الزام آ جائے

اے کاش ہماری قسمت میں ایسی بھی کوئی شام آ جائے

اِک چاند فلک پر نکلا ہو، اِک چاند سرِ بام آ جائے

مے خانہ سلامت رہ جائے اس کی تو کسی کو فکر نہیں 

میخوار ہیں بس اس خواہش میں ساقی پہ کچھ الزام آ جائے

پینے کا سلیقہ کچھ بھی نہیں اس پر ہے یہ خواہش رِندوں کی 

جس جام پہ حق ہے ساقی کا، ہاتھوں میں وہی جام آ جائے

اس واسطے خاکِ پروانہ پر، شمع بہاتی ہے آنسو

ممکن ہے وفا کے قصے میں اس کا بھی کہیں نام آ جائے

افسانہ مکمل ہے لیکن افسانے کا عنواں کچھ بھی نہیں 

اے موت! بس اتنی مہلت دے، ان کا کوئی پیغام آ جائے

انور مرزا پوری