بِیتے ہوئے لمحات کو پہچان میں رکھنا
مُرجھائے ہوئے پھول بھی گُلدان میں رکھنا
کیا جانیں سفر خیر سے گزرے کہ نہ گزرے
تم گھر کا پتہ بھی مِرے سامان میں رکھنا
کیا دن تھے مجھے شوق سے مہمان بلانا
اور خود کو مگر خدمتِ مہمان میں رکھنا
کیا وقت تھا کیا وقت ہے اس سوچ سے حاصل
چھوڑو جو ہوا، کیا اسے میزان میں رکھنا
انسان کی نیت کا بھروسہ نہیں کوئی
ملتے ہو تو اس بات کو امکان میں رکھنا
مخلص ہو رہو ٹوکا ہے کس نے تمہیں انجم
رفتارِ زمانہ بھی مگر دھیان میں رکھنا
انجم خلیق
No comments:
Post a Comment