عکس شکست خواب بہر سو بکھیریے

 عکسِ شکستِ خواب بہر سُو بکھیریے

چہرے پہ خاک، زخم پہ خوشبو بکھیریے

کوئی گزرتی رات کے پچھلے پہر کہے

لمحوں کو قید کیجئے، گیسو بکھیریے

دھیمے سُروں میں کوئی مدھُر گیت چھیڑیے

ٹھہری ہوئی ہواؤں میں جادو بکھیریے

گہری حقیقتیں بھی اترتی رہیں گی پھر

خوابوں کی چاندنی تو لبِ جُو بکھیریے

دامانِ شب کے نام کوئی روشنی تو ہو

تارے نہیں نصیب تو آنسو بکھیریے✩

دشتِ غزال سے کوئی خوبی تو مانگیے

شہرِ جمال میں رمِ آہو بکھیریے💞

پروین شاکر

اللہ غریقِ رحمت کرے، آمین۔ آج مرحومہ پروین شاکر کی چھبیسویں برسی ہے۔