کیا یونہی حریف رسن و دار ہوئے ہیں

کیا یونہی حریفِ رسن و دار ہوئے ہیں

دیوانہ ہوئے، تب کہیں ہشیار ہوئے ہیں

ہستی کو نکھارا ہے مِری آتشِ غم نے

شعلوں پہ جو سوئے ہیں تو بیدار ہوئے ہیں

موقوف نہیں زندہ دلی صحنِ چمن پر

ہم دشت و بیاباں میں بھی گلبار ہوئے ہیں

ہستی کے خم و پیچ سے آساں گزر آئے

پیچ و خمِ کاکل میں گرفتار ہوئے ہیں

آہستہ چل اے بادِ صبا! چھیڑ نہ ہم کو

قسمت سے کہیں خاکِ رہِ یار ہوئے ہیں

اک حرفِ تمنا کبھی آیا نہ لبوں پر

ہاں لفظ ’محبت‘ کے گنہگار ہوئے ہیں

اک عمر بسر کی ہے بہ ایمائے تغافل

تب نیم نگاہی کے سزاوار ہوئے ہیں

پیام فتح پوری

پیام فتحپوری