کارِ بے کار سے آگے کا قدم لیتا ہوں
جو بناتا ہوں اسے توڑ کے دم لیتا ہوں
خاک میں ملتا ہوا دادِ فنا دیتا ہوا
بعض اوقات تو میں راہِ عدم لیتا ہوں
اس محبت کو بہت دیر سہا ہے میں نے
اب اِسے دے کے کوئی دوسرا غم لیتا ہوں
بے قراری ہی کچھ ایسی ہے مِری مٹی میں
جب بھی مرتا ہوں کوئی اور جنم لیتا ہوں
تجھ کو کیا علم مِری ترسی ہوئی خواہش کا
میں ہواؤں سے تِرے ہونٹ کا نم لیتا ہوں
ایک دیوار پہ لٹکی ہوئی تصویروں کو
ایسے تکتا ہوں کہ پھر سانس بھی کم لیتا ہوں
مقصود وفا
No comments:
Post a Comment