اقرار تجھ کو سونپ دوں انکار کس کو دوں
تجھ کو سکوت بخش دوں گفتار کس کو دوں
لہریں ہیں آسمان پر طوفاں ہے پُر شباب
ملاح راہزن ہوئے،۔ پتوار کس کو دوں
ملتے ہیں کربلاؤں میں ماتم زدہ نفوس
مشکل یہ ہے حسینؑ کا کردار کس کو دوں
میں سوچتا ہوں کس طرح تقسیم گھر کروں
سائے پہ کس کا حق لکھوں دیوار کس کو دوں
قربان جاؤں اے مِرے قاتل! بس اک کرم
سر لے، مگر بتا کے جا دستار کس کو دوں
آغوش موت لکھ چکی ہے تیرا مرثیہ
اکمل تِری غزل تِرے اشعار کس کو دوں
افضال اکمل قاسمی
No comments:
Post a Comment