دیکھیں گے پھر ان آنکھوں سے ہم روئے یار بھی

دیکھیں  گے پھر ان آنکھوں سے ہم روئے یار بھی
ہووے گا یہ تمام کبھی انتظار بھی
آئینہ ہی کو کب تئیں دکھلاؤ گے جمال
باہر کھڑے ہیں کتنے اور امیدوار بھی
دشمن تو تھے ہی پر تِری اس دوستی میں اب
بے زار ہم سے ہو گئے ہیں دوستدار بھی
گزری تمام عمر اسی آرزو میں ہائے
دو چار باتیں تم نے نہ کیں ایک بار بھی
برگشتہ طالعی کا کریں اپنی کیا بیان
پھر گئے ہیں ہم سے خنجرِ مژگانِ یار بھی
کیا جانے تیرے کُشتے کدھر خاک ہو گئے
پایا نہ ان کا آہ نشانِ مزار بھی
وقتِ وداع بس کہ تجھی پر نظر گئی
ہونے نہ پائے آپ سے ٹک ہم دو چار بھی
گر تُو نہیں تو جا کے کریں کیا چمن میں ہم
تجھ بِن ہمیں خزاں سے ہے بدتر بہار بھی
اک جانِ ناتواں ہے شکوہ حسنؔ نہیں
ٹھہرا نہ اپنے پاس دلِ بے قرار بھی

میر حسن دہلوی